DÍA MUNDIAL CONTRA A VIOLENCIA DE XÉNERO

Hoxe, 25 de novembro, as nenas, nenos, nais, pais, profesoras e profesores do CEIP As Covas reunímonos para conmemorar o Día Mundial Contra a Violencia de Xénero.

Con este acto e esta pancarta queremos dicir que...

Ningunha persoa ten dereito a:

- Agredir a outra persoa, nin física nin psicolóxicamente.
- A forzar a ninguén a facer algo que non quere.
- A discriminar a ningunha persoa por mor do seu xénero.

Todas as persoas temos dereito a:

- Vivir unha vida libre sen abuso de poder.
- A contalo, cando sean vítimas de violencia ou abusos.
- A buscar apois e pedir axuda.
- A sentir e expresar medo, rabia, tristeza ou alegría.

Por último, queremos manifestar o noso compromiso de traballar para combatir a violencia contra as mulleres e calquer outro tipo de violencia.

NIN UNHA MENOS!!!

Magosto 2016

O día 11 de novembro celebramos o Magosto no CEIP As Covas.

Foi unha xornada chea de diversión, xogos populares e o máis importante, CASTAÑAS!!!

Grazas a todos os asistentes pola vosa participación, pola axuda asando as castañas e por ensinarnos que sempre se pode ser neno. 

Ata o ano que ven!

Samaín 2016

Pasou o días, pasou a romaría!

Despedimos xa o Samaín 2016, non sen antes agradecer a familias e alumn@s os riquísimos doces que achegastes e o traballo coas cabazas. Auténticas obras de arte!

Agardámosvos dentro de ben pouquiño co Magosto 2016!

Moitas grazas.

O EDNL

8º Outono Fotográfico

Ven onda nós o outono
dacabalo do aire;
nos camiños da fraga
os ourizos xa abren.
Síntoo chegar contento
da eterna viaxe
enredando entre as follas,
estreando friaxe.

Ana Mª Fernández.”Ondas de verde e azul”.

Pois sí, o Outono do 2016 xa está connosco e para quedarse unha boa tempada.

 Xa comezamos a ver algunhas follas das árbores no chan ou como o as cores das nosas paisaxes mudan a tonos avermellados e amarelos.  Por outra banda, en canto comece o frío e se acurten os días, algúns animáis comezarán a migrar a sitios máis quentiños e outros a hibernar.  

No CEIP As Covas, pola contra, non temos pensado movernos de Meaño nin botar un soneca. Todo o contrario!

Por octavo ano consecutivo  comezamos co “Outono Fotográfico” e gustaríanos moito que sairades ao monte e nos trouxerades fotos de recordo con descripcións das mesmas para facer unha exposición na entrada da escola.

Animádevos!

Comezamos!

Desta volta fixémonos de rogar un pouquiño, pero xa estamos aquí!

Un novo curso 2016-17 comeza, e con el, unha morea de actividades para seguir dándolle á lingua. Á nosa lingua.

Este ano entraremos de cabeza na Televisión e demostraremos que no CEIP As Covas a "caixa tonta" é máis lista que un allo! Así que lembrade... non cambiedes de canle!

Sáudos e feliz comezo de curso!

Felices Vacacións!

Pois si, chegou o verán e tamén as merecidas vacacións!

 
Dende o blog do Equipo de dinamización da lingua galega quixéramos darvos as grazas pola vosa colaboración, na organización de todas as actividades que se foron desenvolvendo a longo do curso e polo voso apoio.

Pero, sobre todo, pola gran labor que facedes na defensa da nosa lingua. Son moitas as cualidades que teñen os alumnos e alumnas do CEIP de Meaño As Covas, pero unha moi, moi especial é o ben que soa escoitalos falar en Galego; tamén en Castelán, e Inglés, e... pero esa primeira lingua que levan empeza a ser un tesouro que entre todos debemos mimar.

Así que moito verán, mais ocio activo e a gozar destas semanas sen os horarios que o tempo de escola acaba impoñendo.

E non moito mais; pola miña parte despedirme, foi un pracer compartir estes anos que me deron moi bos recordos e que, sen dúbida, tamén me fixeron crecer como persoa. Unha aperta e ata sempre!

Pedro.

Revista Buxaina!

Con un pouco de atraso, pero xa chegou a nosa revista escolar Buxaina. Este ano de xeito monográfico a Manuel María: encrucillados, aspectos da súa obra e algún dos seus contos.

E non nos podemos esquecer da despedida do alumnado de 6º, fai pouco viñan da infantil e xa están marchando para o instituto (...)

Esperamos que vos guste a nosa revista escolar, tentaremos que nas clases teñades un exemplar para compartir nestes ultimos días do curso.

Saúdos dende o EDLG!

Mini e Mero cantan con Nós a Manuel María

Hai anos nos que a celebración das Letras Galegas permítenos coñecer con mais profundidade as obras dos autores homenaxeados. Pasounos con Novoneyra, con Vidal Bolaño... e, claro, neste 2016, tíñamos a Manuel María. Poeta, sobre todo; pero, sen dúbida, unha gran referencia para a nosa cultura.

Tentamos achegarnos á súa obra, aos seus contos, á súa vida. E que mellor modo de concluír este curso que cantando os seus poemas con Mini e Mero, amigos persoais del e que tan ben musicaron as súas verbas. Pois isto foi o que aconteceu na nosa escola este venres: música, poemas e unha sensación de que se estaba a vivir algo moi especial na defensa da nosa lingua.

Esperamos contar en breve cos vídeos do que foi este encontro, pero, mentres, aquí vos queda unhas poucas fotos da xornada. E a música? Iso o deixamos a gusto de cada uno, aínda que vos podemos deixar unha proposta que sempre funciona: "O Carro"

Saúdos dende o equipo de dinamización da lingua galega.  

Excursión a Santiago!

Intenso final de curso o que estamos a ter. Onte foi un “clásico das excursión”; visita a Santiago de Compostela, con ruta polos tellados da Catedral, visita didáctica polo Museo de Pobo Galego e xogos a fartar nos Xardíns de Bonaval. Unha magnífica xornada na que ata o tempo acompañou.

Deixámosvos unhas cantas fotos, para que vexades o que foi a nosa incursión por Santiago. E, coma sempre, se considerades que algunha imaxe non debería estar subida ao blog, avisade que se retirará o mais axiña posible.

Saúdos!

Aprazamos a xornada con Mini e Mero

Como se soe dicir; problemas do directo!
Mañá enviarémosvos unha nota a todas ás familias coa nova data, pero lamentablemente este venres non haberá cancioneiro para recordar a Manuel María.
(Mais tempo para ensaiar, non?)

Un saúdo dende o equipo de dinamización da lingua galega.

O venres... Cantamos a Manuel María con Mini e Mero!

Pois nesta semana rematamos o noso mes Das Letras Galegas e facémolo con música, porque Manuel María é o poeta mais musicado da nosa lingua. Contaremos coa visita de Mini e Mero, para facer da mañá do próximo día 3 un diálogo musical no que non faltará  “O Carro”, “O aradiño” ou “O cuco”.

Gustaríanos que puiderades participar todos e todas desta xornada pero a realidade é que estamos moi limitados de espazo, así que se estades interesados en vir e cantar con nós, agradecerémosvos que chamedes ao cole nestes días para confirmar a vosa asistencia.

Un saúdo e vémonos o venres!

Último día con Mark

Pois si, este venres foi o derradeiro día de Mark na nosa escola. Durante estes dous cursos a súa axuda foi un referente para todos, e permitiunos mellorar a nosa competencia lingüística en inglés. 

Temos que agradecerlle a súa participación e a integración na vida do centro; de feito,  posiblemente fale o mellor galego de toda California.  

O dito, foi un pracer contar coa súa presenza na nosa escola e confiamos velo novamente nalgunha das nosas actividades.

Moi boa sorte na túa nova escola. See  you soon, Mark!

Celebrando a Semana das Letras Galegas

Dentro da celebración das Letras Galegas tivemos no día de onte unha xornada moi especial. A nosa particular ruta ata os muíños de Lores, onde nos esperaban avós, avoas e tamén algunha bisavoa; para contarnos contos dos de sempre e algunha historia que aínda que o parecera, de conto non tiña nada.

Xogos, merenda, e mais contos, en galego! Coas historias cheas de retranca, humor e amor de “Tropa de trapo”.

Unha día no que nos acompañaron os alumnos da Unitaria de Xil, os mais pequenos da Galiña Azul e moitas familias que puideron achegarse a compartir esta xornada na que as verbas de Manuel María soaron mellor que nunca:

“O idioma é o amor,

o latexo, a verdade,

a fonte da que agroma,

a mais forte irmandade”.

Deixámosvos unhas poucas fotos, esperamos que vos gusten. E, recordade, no caso de que vexades algunha que non debería de estar compartida; avisádenos que se retirará o antes posible.

Saúdos dende o Equipo de dinamización da lingua galega.

Semana das Letras Galegas

Comezamos a Semana das Letras Galegas. Aínda que, en realidade, levamos xa moito tempo celebrando as obras que nos deixou Manuel María: proxectos de traballo, obradoiros de poesía e incluso exposicións itinerantes; como a que tivemos a pasada semana no noso centro. Unha mostra de carteis – murais realizados polos IES Francisco Asorey de Cambados.

Estade atentos ao blog que en breve daremos mais información das actividades que imos a realizar. Saúdos!