Rematamos!

A piques estamos de rematar este curso 2014/15 e que mellor maneira de facelo con todo un Festival. Calorazo o que pasamos, pero incrible o ben que se portaron os rapaces. Aquí vos deixamos unhas poucas fotos desta xornada de festa e de despedidas.
E rematamos con unha aperta aos nosos alumnos de sexto cos que temos compartido tan bos momentos e ao seu titor; Pedro, dende o EDLG queremos mostrarte o noso recoñecemento, da gran labor realizada en prol da nosa lingua e na dirección desta escola. Moita sorte na túa nova etapa.

Feliz verán a todos e todas! E, coma sempre, se vedes que algunha foto non debería de estar na galería, avisádenos e se quita rápidamente.

Fin de curso!

Pois ata aquí chegamos! Mañá acábase este curso 2013/14 e daremos paso a unhas vacacións que ben vos merecedes. Confiamos en que o verán vos traía moitas xornadas de diversión, que aproveitedes o tempo de lecer para xogar na praia, no campo ou onde mais vos guste. Deixemos un pouco de lado as pantallas e busquemos a compaña dun bo libro, que nunca nos fallará; e vémonos en setembro!  Seguro que vos vemos moito mais crecidos...

Deixámosvos coas fotos do festival de fin de curso; emocionante, trepidante, divertido e emotivo. Agora só falta que vos gusten. Veña, unha aperta dende o Equipo de dinamización da lingua galega e, xa sabedes, a disfrutar do verán!

E colorín, colorado…

… ese curso está rematado! Pois si, chegamos ao derradeiro día deste curso escolar. A verdade é que, entre que o tempo segue noutra estación e que a moitos de nós pasounos o trimestre voando, non nos damos crido que empecen as vacacións.

Pero a realidade é que estamos en verán, o voso tempo de lecer. Esperamos que o aproveitedes da mellor maneira posible, na praia, no monte, viaxando, lendo, xogando… Pero deixade as pantallas por unha tempada, aproveitade estes días tan longos e non paredes de crecer, que en setembro non vos imos a recoñecer.

E que dicir do día de hoxe, festival? Non… Mais ben Festa-Rachada! Houbo música, baile, teatro e a despedida dos maiores; que se nos marchan ao instituto, os de sexto. Pero estamos convencidos de que non tardarán moito en facernos algunha que outra visita.

Para rematar, as fotos! Coma sempre, sei que haberá nenos e nenas que non aparecedes, pero tedes que comprender que é moi difícil collervos a todos. Espero que vos gusten, para min foi un pracer tomarme este café de tarde mentres ía seleccionando as fotos e recordando a magnífica xornada que tivemos. Así que, hoxe firmo eu, Pedro, o de EF, o coordinador deste gran Equipo da dinamización da lingua galega, e que en nome de todos queremos desexarvos unhas felices vacacións!